Serikali yatoa ufafanuzi kuhusu Kuharibika kwa Mashine ya X-ray Hospitali ya wilaya ya Kahama.

Baadhi ya wananchi  wilayani Kahama mkoani Shinyanga  wamelalamikia  kitendo cha kuharibika kwa mashine ya  vipimo vya Mionzi  (digital, X- ray)  na kusababisha kutofanya kazi  katika hospitali ya halmashauri ya Mji wa Kahama.

Malalamiko hayo  yametolewa jana (Dec 19) katika kundi la Mtandao wa Whatsap la Kahama News ambapo  baadhi ya wateja wameonekana wakilalamikia kuhusu kukosekana  huduma hiyo.

Katika malalamiko hayo baadhi ya wateja wameshangazwa kuambiwa  huduma hiyo haipatikani kwa sasa kutokana na kuharibika kwa mashine hiyo huku wakidai kuwa  wamelipia kiasi cha shilingi 5,000 kwaajili ya  kupata kadi ya kwenda kuonana na daktari.

Katika mjadala huo uliodumu kwa dakika kadhaa, Mkurugenzi Mtendaji wa halmashauri ya Mji wa Kahama ANDERSON MSUMBA amekiri kuharibika kwa Mashine hiyo na kusema kuwa  mashine hiyo ni mpya  na ya kidigtali  ambapo ipo chini Bohari Kuu ya dawa Tanzania, (MSD).

Amesema tayari wamewasiliana na MSD kwaajili ya kumtuma fundi ambapo alipaswa kufika siku ya juzi na kwamba   atafika leo kwaajili ya kulishughulikia hilo ambapo ameomba radhi kwa usumbufu uliojitokeza na kwamba halmashauri hiyo inampango wa kununua Mashine ya X RAY katika kituo cha afya Mwendakulima.

Kuhusu malipo ya Shilingi 5,000 MSUMBA amesema  kwamba shilingi 3,000 ni kwaajili ya kadi, na shilingi 2,000 ni  kumuona daktari na kwamba bila ya kumuona daktari huwezi kujua  vipimo  vya kufanya huku akiwataka wananchi kujiunga na Mfuko wa bima ya afya ya CHF iliyoboreeshwa.