Mtandao wa Kupinga udhalilishaji Pemba,watoa elimu ya umuhimu wa kuripoti kesi.

Na Gasper Charles-Pemba

MTANDAO wa kupinga udhalilishaji Wilaya ya Mkoani Pemba umefanikiwa
kutoa elimu ya umuhimu wa kuripoti kesi za udhalilishaji na kutoa
ushahidi mahakamani kwa zaidi ya wanajamii 2,060 katika Shehia 22 za
Wilaya hiyo kuanzia mwezi Mei hadi Augusti mwaka huu.

Wajumbe wa mtandao huo wamebainisha hayo wakati wa kikao cha
uwasilishaji ripoti ya ufuatiliaji wa vitendo vya vya udhalilishaji
katika ofisi za Chama cha Waandishi wa Habari wanawake TAMWA ZNZ Pemba.

Walisema katika kipindi hicho wajumbe wa kamati hizo waliandaa mikutano
ya utoaji wa elimu katika makundi mbalimbali ya jamii ikiwemo Skuli,
Misikitini kwenye shehia pamoja na urushaji wa vipindi kupitia redio za
kijamii.

Aidha walibainisha kuwa kupitia utoaji wa elimu katika jamii juu ya
athari za vitendo vya udhalilishaji na ushajihishaji wa jamii kuripoti
kesi hizo zinapotokea, hatua hiyo imeanza kuleta mabadiliko katika
jamii.

Shaaban Juma Kassim Kutoka Jumuiya ya wasaidizi wa Sheria Wilaya ya
Mkoani MDIPAU alisema kutokana na juhudi hizo za kutoa elimu kwa
wanafunzi wameanza kuelewa athari za udhalilishaji na namna ya kuripoti
kesi hizo.

“Baada ya kuchukua juhudi hizi za kwenda kutoa elimu mashuleni,
tunashukuru hivi sasa wanafunzi wameanza kuelewa udhalilishaji na
matukio yamepungua kwa baadhi ya shehia,” alisema.

Kwa upande wake Abdalla Saleh Issa kutoka jumuiya ya maendeleo ya vijana
-YACDES amesema kupitia utoaji wa elimu ya stadi za maisha kwenye jamii
wamefanikiwa kuwaunganisha zaidi ya vijana 15 kujishughulisha katika
shughuli za ujasiriamali.

“Tuliandaa utaratibu wa kutoa elimu ya stadi za maisha kwenye jamii na
kufanikiwa kuwafikia vijana 15” alisema.

Mratibu wa Chama cha Waadishi wa Habari wanawake TAMWA Zanzibar Ofisi ya
Pemba, Fat-hiya Mussa Said aliwataka wanamtandao huo kuongeza juhudi
katika kutoa elimu kwa jamii ili kuhakikisha vitendo hivyo
vinatokomezwa.

“Niwaombeni tuendelee na juhudi hizi za kuielimisha jamii na kuwasaidia
wahanga wa vitendo hivyo kupata haki zao bila kuogopa vikwazo
vinavyotukabili kwani jamii inahitaji msaada wetu,” alisema.

Kikao hicho ni mwendelezo wa utekelezaji wa mradi wa kuongeza nguvu
kwenye juhudi za mapambano dhidi ya vitendo vya udhalilishaji kwa
ufadhili wa Finland.

Leave a Reply

Your email address will not be published. Required fields are marked *