Miundo mbinu ya mitaro soko la namanga kahama kero kwa wateja

Katika kukabiliana na ubovu wa miundombinu katika soko la Namanga mjini Kahama  halmashauri ya Mji huo imeshauriwa kujenga mitaro  katika kingo za barabara zinayozunguka soko hilo ili kuyadhibiti maji yanayopita katika barabara hizo na kuharibu miundombinu hiyo.

Hayo yamesemwa  mjini Kahama na baadhi ya wananchi waliozungumza na Kahama fm kuhusu changamoto ya mashimo yaliyokuwa katika barabara zinazozunguka  soko hilo.

Wamesema  kuna mashimo mengi na ya muda mrefu hali iliyosababisha usumbufu mkubwa kwa watumiaji wa barabara na kuupongeza uongozi wa Kata  hiyo kwa kuhamasisha wananchi kuchangia fedha ili kusambaza vifusi vilivyotolewa na halmashauri ya mji wa Kahama kwaajili ya kuziba  mashimo hayo.

Diwani wa Kata ya Kahama mjini, HAMIDU JUMA amewapongeza  wananchi waliojitolea kuchangia kusambaza vifusi kwenye mashimo hayo na kwamba hali ya miundombinu ya barabara katika soko hilo bado   ni changamoto kubwa inayohitaji kutatuliwa.

Barabara nyingi mjini Kahama  zimekuwa zikilalamikiwa kutokana na ubovu na kuziba kwa mitaro hali iliyomlazimu mkuu wa wilaya, ANAMRINGI MACHA kuwaagiza  wananchi kuhakikisha wanatoa udongo na taka katika mitaro iliyopo mbele ya Nyumba zao ili kuhakikisha barabara zinakuwa safi.